May lain pa?

Kada buntag sukad pa pagkagamay nako, sikwate jud ang kina-sikatan para pamahaw. Maskin pa'g naay champorado, lami gihapon iparis ug sikwate. Kanang ispiso ug tam-is nga sikwate.

Maskin unsaon pa, lami jud ang sikwate. Ibahog sa kan-on, iparis ug puto, tusluban ug pan, bibingka ug budbud. Bisan unsa pay pamahaw, di jud kumpleto kung way sikwate. Sus, gimingaw na jud ko'g sikwate ug ensaymada para pamahaw.

Ang kinahanglan para sikwate, kanang maayung klase nga tabliya, ug kalamay. And tabliya, gikan sa liso sa kakaw nga gibulad, gigisa, gikuha'ag panit, ug gigaling. Katong naghimo mig tabliya sa bukid, humot kaayu among kusina.

Sa Argao, ang kinalamian nga tabliya, gikan sa ka Nang Gilang. Pangutan-a pa akong lola! Adto mi mupalit sa ka Tia Bebe nga tindahan sa merkado kay mao man among suki ug tabliya.

Suod mi sa sikwate. hahaha.. Akong manghod nga laki gipangalaan kuno ug tabliya sa akong mama. Maong maypagka-itomon akong manghod. Pero gibawi pod kay arangan man pod ug hitsura. Way mosupak kay tinuod nga gwapo akong manghod, ug usa pa, ako ning blog! Paghimo'g imo kung supak ka!

Bitaw, muni-muni ra ni sa usa ka Argawananong nagdamgo tawon nga makahigop ug init nga sikwate pohon. Hahay...